Saturday, June 3, 2017

ಕರೆಂಟು ಹೋದಾಗ ಕಳೆದ್ಹೋದವರು



ಕನಸಲ್ಲಿ ಮಾತು ಮುಗಿಯುವ ಹೊತ್ತಿಗೆ
ಹೆಸರು ನೆನಪಾಗದೆ ಕಾಡಿದರೆ,
ಮುಖವುಂಟು ನೆನಪಿಗೆ
ಆದರೆ ಏನಂತ ಕರೆಯುತ್ತಿದ್ದೆನೋ ಅವನ
ಆಗಾಗ ಹೀಗೆ ಅರೆಗನಸಾಗುತ್ತಾನೆ
ಏಳುವ ಹೊತ್ತಿಗೆ

ಹಗಲು ಜೊತೆಗಿದ್ದು
ರಾತ್ರಿ ಅಮ್ಮನ ಪ್ರಶ್ನೆಯಾಗುತ್ತಿದ್ದ
ಏನಂದ ಇವತ್ತು ಕರಿಯ?
ಅಲ್ಲ, 'ಕರಿಯ' ಇರಲಿಕ್ಕಿಲ್ಲ
ಅಕ್ಕ ಪಕ್ಕವೇ ಏನೋ ಆಗಿದ್ದ, ಕರಿಯನಾಗಿರಲೂಬಹುದು

ಮುಂಗೈಗೆ ಉಗುಳು ಹಚ್ಚಿಕೊಂಡು
ತ್ಯಾಂಪಿಲೀಸ್ ಎಂದವನೆ
ಹೊಸ ರೂಲ್ಸ್ ಹೇಳುತ್ತಿದ್ದ
ಮರುಕ್ಷಣವೇ ಚೋರಿಂದ ಪಾರಾಗುತ್ತಿದ್ದ
ತಿಳಿಯದೆ ಮಂಕಾಗುತ್ತಿದ್ದೆ ನಾ,
ಅಮ್ಮನ ಬಳಿ ರಾತ್ರಿ ಹೇಳಲೊಂದು ಕಥೆ ಮಾಡಿಕೊಂಡು

ಕರೆಂಟು ಹೋದರೂ ಕಾಣಿಸುತ್ತಿದ್ದ
ನಾಶಿಪುಡಿ ಅಂಗಡಿಯ ಬಳಿ
ಜೀ..ssS .. ಎಂದು ಅರ್ಧ ಊರು ಸುತ್ತಿಸಿ
ನಡು ನಡುವೆ 'ಡೇಂಜರ್!' ಎಂದು ಕೂಗುತ್ತ ಕತ್ತಲಲಿ

ಅಂಗಾಲಿಗೆ ನಟ್ಟ ಜಾಲಿ ಮುಳ್ಳಿನ ನೆನಪಿಗೆ ಸಿಕ್ಕಿ
ಉಡದಾರದ ಪಿನ್ ನಿಂದ ಹೆಕ್ಕಿ ತೆಗೆದು
ನೋವಲ್ಲಿ ಕಣ್ಣು ಮುಚ್ಚಿದಾಗ
ಮುಳ್ಳಿನ ಸಮೇತ ಮಾಯವಾದವಾ.


- ಕಳೆದು ಹೋದ ಕೆಲ ಹಳ್ಳಿ ಗೆಳೆಯರ ನೆನಪಿನಲ್ಲಿ.
         

ಗುರುದೇವ್ ಹೊಯ್ಸಳ - ಇಷ್ಟವಾಯಿತು. ಹೇಗೆ, ಏನು, ಎತ್ತ...

ನಾವು ಸಿನೆಮಾ ಹಾಲಿನ ಕತ್ತಲಲ್ಲಿ ಕುಳಿತಾಗ, ತೆರೆ ಮೇಲೆ ತೋರಿಸುವ ಬೆಳಕಿನಾಟವೊಂದನ್ನೇ ಎದುರು ನೋಡುತ್ತೇವೆ. ಕೆಲವೊಂದಷ್ಟು ಕಾರಣಗಳಿಗಾಗಿ ಆ ಕತ್ತಲ ಮೊರೆ ಹೋಗಿರುವ ನಾವು,...